Un Natale da favola
…E poi venne il mattino
(dopo una notte insonne
la memoria stordita
ancora ferma all’ora del tramonto)
nel risveglio col sole
i sensi stanchi
e tu compagna(dal russare lieve)
la bocca semiaperta
tra le lenzuola umide d’amore
a ricordarmi
la tua pazienza
da raffrontare
ai primi infami segni
dell’età.
Il cardellino
sul davanzale
beccava un mezzo chicco di caffè
risvegliando la voglia
e il desiderio
d’un natale da favola
per noi.
Luciano Somma
È Natale
‘O palpito ‘e mille campane
che sonano p’‘a mezanotte
‘a gioia che da’ st’ammuina
anticipa nu quarantotto.
Aunite, c’‘o sciato ‘e ll’affetto,
ce sta’ tutta quanta ‘a famiglia
è doce a campà stu mumento
ch’astregna sti core, atturciglia.
Miraculo ‘e n’attimo ‘e pace
na sosta pe’ l’anzia e l’affanno
pe’ nuje, ca pasture ‘e presebbio,
avimmo campato nat’anno.
Vurria ca stu tiempo nemico
putesse fermà sti minute,
sti ffacce, sti vvocche, sti mmane.
na voce ch’allucca: Salute!
Chist’uocchie che guardano ‘a cimma
‘e n’albero addò l’abbundanza
sta dint’‘e ggranate d’‘e lluce
ch’appicciano ‘o ffuoco ‘e st’ausanza.
Chist’uocchie ca cercano ‘o bbene
tra mille culure ‘e biancale
stunate e ‘mbriacate p’‘o vino
mo so’ lampe ‘e vita, è Natale!
Luciano Somma
Natale d’oro
Nuvole, tanta nuvole, p’‘o cielo,
addo’ na luna avara sta’ durmenno,
cummogliono sta Napule c’‘o velo
‘e na cuperta arricamata argiento.
Pe’ ll’aria ‘o suono doce ‘e na zampogna
pare dicesse «‘O vvi’, stammo a Natale»
cercammo ‘e cancella’ d’‘a mente ‘e guaje
pienze a fa’ bbene, scòrdate d’‘o mmale.
Fore a’ na chiesia ride nu pezzente
ringrazia a chi l’ha dato mille lire
e tene mente a chi nun ce da’ niente
comme pe’ di’ «Stò cca’,che d’è nun vide?»
Chesta città ch’ha sbalurdito ‘o munno
è sempe bella, è tutta nu splennore
comme a chi dorme e fa’ nu bellu suonno
‘e nu Natale arravugliato d’oro.
Luciano Somma
N’ at’ Alba
L’eco luntano
ca chiano se perde
d’‘o suono ‘e nuvena,
ce porta na nota
‘ntunata d’‘a musica
doce ‘e Natale.
Pe’ ll’aria,
prufumo ‘e Dicembre,
l’addore d’‘e ppigne.
Pe’ vvie,
frasturnate ‘e rummore,
na smania ‘e sereno.
E ll’uocchie
s’aizeno ‘ncielo
cercanno na lampa cchiù nova
ca desse a stu munno
cuncreta certezza,
ca desse a nu suonno,
vacante ‘e speranza,
chiarore ‘e n’at’alba,
n’at’alba ‘e Natale.
Luciano Somma
24 Dicembre
E’ nu ricamo ‘o suono ‘e na zampogna
ca vene ‘a miez’’a via, fredda e sulagna,
e dint’a chesta casa chiena ‘e luce,
quanti ccose se stanno appriparanno.
Nannina sta facenno ‘e zeppullelle
‘e cavule e ricotta mentre ‘o nonno
smiccéa scapuzzianno ‘ncopp’‘a seggia
‘o nennillo ca ‘o tira p’’o cazone.
Mammema sta taglianno ‘o capitone.
Papa’ sbarianno attuorno a stu presebbio,
smanea pa’ fa’ appiccia’ na lampadina
senza addunarse ca s’e’ fulminata.
E pe’ tramente ‘o viento tuppettea
‘nfaccia ‘e llastre, io sento dint’’o core
nu tremmulio, nu spànteco, na freva,
n’arteteca me frezzechèa ‘int’’e vvene.
E sfrenneséo, guardanno chistu vico,
me pare d’‘o vedè ammantato ‘e janco
isso,ch’è stato sempe puvieriello,
all’uocchie mieie mo pare nu rignante.
‘a campana d’‘a chiesia d’‘a cuncordia
mo gia’ se fa’ senti’, sunanno a ffesta,
manca nu quarto d’ora a mezanotte,
sorema guarda fore a’ na fenesta…
«‘o pranzo e’ pronto!» – nanninella allucca
v’arraccumanno stu giarrone ‘e vino
si non po’ doppo cca’ se fa ‘a cummeddia;
pirciò cercammo ‘e nun ce ‘ntusseca’.
Ninno mo dorme ‘mbraccio a mammarella
dint’’a stanza tutto è silenzio attuorno,
io guardo chesta scena,comm’è bella!
Sta pace ‘int’’a famiglia comm’è doce!
Ma ‘o nonno rompe stu silenzio ‘e ggelo
è ‘o cchiu’ abbasato e dice cose sante:
«è nato ‘o figlio ‘e ddio, nostro signore!»
…E ce facimme ‘a croce tutte quante.
Luciano Somma
L’urtema nuvena
‘E zampugnare
sempe cchiù raramente
se vedono p’‘e vvie
addò ‘a folla pe’ correre
nun tene manco ‘o tiempo
‘e risciatà.
Pe’ ll’aria, ‘nzieme a nu prufumo ‘e pigne,
se spanneno ‘e nnote, letania ‘e dicembre
‘e na nuvena scurdata…
Quanta suspire vedenno
na sporta ‘e legnasante…
Fore a na chiesia
miez’‘o tanfo d’‘a gente,
esce ‘o coro ‘e n’ave mmaria
mentre na mana se stenne…
Natale nun è pe’ tutte quante
na festa, nu mutivo d’alleria,
è quase sempe na malincunia
pe’ chi tene ‘int’‘o core na poesia.
Addò sta cchiù chella canzone antica
ca parlava d’ammore ‘e nu cafone
pe’ na signora, ch’era tutta napule,
chien’‘e ricchezza, tutta nu splennore.
E mo sti pasturielle,
luntane d’‘a famiglia pe’ nu mese
accummneciano quanno è ‘a mmaculata
cercanno ‘a carità pe’ na sunata.
Dint’‘e vascie
addò na vota steveno ‘e madonne,
o na figura ‘e sante, o giesù cristo
truneggia grossa ‘na televisione.
Ma che scennite a fà ‘a sti muntagne
d’‘o mulise, matese, d’avellino,
nun v’accurgite c’ogge n’automobbile
nun v’accumpagna comme a nu traino…
Chiagneve ajere nu ciaramellaro,
core ‘e pute, nu travaso ‘e bbene
mentre sunava, comm’a ffunerale,
‘e nnote triste ‘e ll’urdema nuvena…
Luciano Somma
Pecchè solo a Natale?
‘O suono ‘e na zampogna
na smania ‘e vulè bbene,
N’albero chino ‘e luce
nu desiderio ‘e pace.
Se stenne ‘a mano pure
a n’antico rivale
se sprecano l’augurie,
è ggià, pecch’è Natale.
Sarrà p’‘o clima ‘e festa
che porta ‘a ricurrenza,
‘o core cagna veste
ritrova na cuscienza.
‘Sta vita, pe’ nu juorno
diventa na livella
e ‘a ggente tutt’attuorno
chisà, pare cchiù bella!
Pure n’ommo ‘nfamone
carezza n’animale
nun fà cchiù ‘o fetendone
le pare naturale.
‘O popolo ‘e stu munno,
arravugliato ‘e male,
diventa bbuono ‘nfunno…
Pecchè sulo a Natale?
Luciano Somma